主子咬電線點算好？應該點樣防止貓咪咬電線呢？如果你屋企隻貓好鍾意咬電線，一定要小心佢可能會觸電，或者引發其他電器安全問題。執好啲電線唔單止係為咗整齊，更係為咗保護主子同埋確保家居用電安全呀！
簡單 4 招教你電線隱藏術！杜絕電線被咬斷報廢，等養貓嘅單位可以乾淨企理又清爽。
點解養貓家庭一定要執好電線？
1. 避免主子亂咬造成危險
電線被咬穿好容易造成主子觸電，甚至引起漏電火災等嚴重問題。
2. 提升家居環境質感
視覺上變到好清爽，執屋效率都會提升好多。
電線隱藏簡易 4 招！
1. 利用束帶固定電線
將雜亂無章嘅電線利用束帶分類綑綁。
注意！電線唔可以過度凹折或者夾硬捲成細圈，咁樣會造成散熱困難，分分鐘會搞到電線走火㗎！
2. 電線收納盒
將拖板同插頭放入收納盒，遮住晒啲亂糟糟嘅線。揀啲素色或者同屋企風格接近嘅款式，整體觀感更有質感。
注意！入面嘅電線同樣唔可以過度屈摺或綑綁，以免過熱發生危險。
3. 用配線槽（走線槽）隱藏
適合用喺位置固定嘅家電（例如電視、雪櫃）。將線收埋喺牆邊嘅線槽入面，主子就完全無從入手。
4. 用裝飾品遮擋插座、電線
「眼不見為乾淨」，遮住咗主子就唔會咁易引起佢哋嘅好奇心。利用唔同嘅裝飾小物，仲可以順便提升屋企嘅格調氛圍！
你屋企嗰隻都係「電線破壞王」？去我哋 IG 留言同大家分享吓你防止貓咬電線嘅小秘訣啦～
Sale!
