對於貓奴嚟講，貓咪對眼唔單止係視覺器官，更係溝通情緒嘅「靈魂之窗」。
相較於狗狗豐富嘅表情，貓咪雖然睇落高冷，但佢哋嘅眼神，特別係瞳孔嘅形狀同大細，可以精準傳遞由極度愛意到準備開波攻擊嘅各種訊息。
貓眼嘅構造同人類大唔同，具備強大嘅夜視能力同光線調節功能，令佢哋嘅瞳孔可以喺極短時間內由一條細線，變到好似隻碟咁圓。
讀得明呢啲貓瞳孔變化，係成為一位合格剷屎官嘅必備技能。
貓咪對眼形狀：垂直狹縫嘅狩獵秘密！
1. 垂直瞳孔嘅優勢
貓咪嘅瞳孔形狀非常獨特，呈現垂直狹縫狀（Vertical Slits）。呢種形狀係演化上嘅優勢：
- 光線精準控制：垂直瞳孔能比圓形瞳孔更精準咁控制進入眼球嘅光線量，喺強光下幾乎可以完全閂埋，保護脆弱嘅視網膜。
- 深度感知：呢種垂直狹縫能提升主子喺狩獵嗰陣對縱向深度嘅感應，判斷獵物距離嗰陣特別有用。
2. 眼睛形狀與性格嘅關係
雖然無絕對科學根據，但好多家長觀察到眼型同主子性格有微妙關係：
- 圓眼貓：眼神較柔和，通常性格比較黐人、膽仔大啲。
- 杏眼貓：眼神較銳利，通常性格傾向獨立或警戒心較強。
貓眼變化：讀明「貓之吻」與肢體語言！
主子嘅眼神係好複雜嘅，我哋唔可以淨係睇瞳孔，一定要結合肢體語言（耳仔位置、尾巴擺動、叫聲）嚟綜合判斷佢嘅情緒。
貓瞳孔變化係「光線」同「情緒」嘅雙重結果。例如喺昏暗環境，就算係嬲，瞳孔都唔會縮到極細。所以判斷基準係：喺目前光線下，瞳孔係咪比環境所需嘅大細更大或者更細？
1. 貓咪瞳孔放大
當主子瞳孔放大成圓形，變到好似兩粒黑色大珍珠咁，代表緊強烈嘅情緒波動。
- 生理原因：環境太暗
光線昏暗係瞳孔放大嘅主要原因，主子要最大限度咁獲取光線，幫佢哋喺黑暗中睇清楚嘢。 - 情緒原因：興奮 / 狩獵
- 興奮： 見到鍾意嘅玩具、零食，或者玩緊嗰陣腎上腺素上升。
- 狩獵模式： 準備撲擊前會提高專注度，通常會伴隨「揈屁股」準備姿勢。
- 情緒原因：恐懼 / 壓力 / 威脅
呢個係最需要警惕嘅情況！當主子感到極度威脅或驚恐嗰陣，瞳孔會擴張到極限：- 戰或逃（Fight or Flight）：準備迎戰或逃跑嘅生理反應，例如聽到吸塵機聲或者去到生保環境。
- 警訊：呢個時候主子壓力爆煲，應即刻移除壓力源，畀佢哋匿埋。
2. 貓咪瞳孔縮小
貓瞳孔縮細（適度收縮，但未到一條線）都分為兩種完全唔同嘅情緒：
- 放鬆與滿足（適度收縮）
- 狀態：主子半合眼、眼皮垂落，瞳孔保持適度大細。
- 含義：代表感到滿足、溫暖同埋安全（通常伴隨呼嚕聲）。
- 攻擊前最後警告（快速收縮）
- 狀態：瞳孔快速變窄，眼神死盯住唔放。
- 含義：呢個係佢準備出爪攻擊或者大發脾氣嘅最後警告。
- 應對：如果主子咁樣死盯住你，千祈唔好直視返佢（直視對貓嚟講係挑釁），可以緩慢眨眼並慢慢退後。
3. 貓咪瞳孔一大一小
如果你發現主子對瞳孔一大一小（兩邊直徑唔同），呢個絕對唔係情緒問題，而係嚴重嘅醫療警訊，必須即刻處理！
呢種現象叫瞳孔大小不等（Anisocoria），通常代表神經系統或者眼部結構出現異常。
可能病因包括：
- 眼疾：青光眼、眼內發炎、角膜潰瘍。
- 神經問題：頭部受傷、腦腫瘤、視神經受損。
- 全身性疾病：嚴重高血壓、貓傳腹（FIP）等。
發現主子瞳孔唔對稱，請視為緊急狀況，即刻帶去獸醫診所檢查。
4. 貓眼變到一條線
當你見到主子對眼縮到變一條線，通常係光線同情緒共同作用嘅結果：
- 光線因素：保護視網膜
喺陽光充足或者強光環境下，瞳孔會縮到極細，係眼球嘅自我保護機制。 - 情緒因素：攻擊或高度專注
如果環境唔係特別光但瞳孔縮細，通常代表：- 攻擊性：佢感到好唔滿、好嬲，準備發動攻擊。
- 高度專注：鎖定咗獵物（如蟲仔或玩具），準備飛撲。
- 溫馨提示：如果縮細瞳孔之餘仲伴隨飛機耳或者炸毛，千祈唔好夾硬摸，否則好易被抓傷。
5. 貓咪緩慢眨眼
呢個係貓奴最想見到嘅訊號，亦即係「貓咪嘅親吻」：
- 含義：主子喺極放鬆同信任你嘅狀態下，會對住你緩慢眨眼。
- 意義：表達愛意同埋「我對你完全無防備」。
- 回應：家長都可以對返主子緩慢眨眼，可以增加大家嘅感情連結呀！
貓眼常見 Q&A
Q1：點解主子瞳孔長期放大？
A：健康的貓瞳孔會隨光線變。如果喺夠光嘅地方依然持續放大，可能有以下問題：
- 高血壓：特別係老貓，高血壓可能導致視網膜剝離，令瞳孔持續放大。
- 失明：視網膜病變令瞳孔無法對光線起反應。
- 慢性疼痛：長期忍痛（如嚴重關節炎）亦會令瞳孔微擴張。
Q2：瞳孔唔識收縮係咪正常？
A：絕對唔正常。如果瞳孔對光線完全無反應（Fixed Pupils），可能代表：
- 視力喪失：已經感應唔到光。
- 腦部受損：神經路徑受損。
- 中毒：誤食有毒植物（如百合花）或藥物。
Q3：眼部出現咩狀況要即刻睇醫生？
A：如果主子對眼出現以下狀況，請即刻去診所：
- 頻繁瞇埋一邊眼：可能角膜受損或者發炎。
- 流眼水、分泌物變多：可能係結膜炎或者貓流感。
- 對眼紅腫：有機會係外傷或嚴重發炎。
- 第三眼瞼長時間突出：代表主子病咗或者壓力好大。
