貓貓煲水聲代表咩意思？除咗開心、放鬆之外，貓煲水亦有可能係因為緊張、驚，或者有求於你，貓貓每種情緒嘅煲水聲都唔同㗎。
唔單止咁，貓貓煲水聲竟然仲有幫助人類放鬆、療癒嘅效果！一齊嚟睇下四種音頻嘅貓煲水聲，分別代表咩意思啦～
貓貓嘅「煲水聲」係點樣發出嚟？
目前仲未有最確切嘅答案。
但多數專家認為係由喉部肌肉、橫膈膜肌肉，伴隨住中樞神經系統有規律嘅神經震盪，每秒大約 20 – 30 次快速移動肌肉所造成。
貓煲水代表咩意思？唔一定係開心？
1. 低音：恐懼、自我安撫 / 疼痛、減輕痛楚
20 – 140 赫茲嘅低音煲水可以緩解焦慮、減輕痛楚、幫助傷口癒合，通常會出現喺貓貓好驚、好痛、生BB、甚至臨終嗰陣，傳達嘅訊息係「好難受、幫下我」。雖然仲未有更深入研究，但專家發現貓貓嘅低音煲水聲可以促進骨骼生長、治癒傷口、減輕痛楚。
所以有啲貓貓睇獸醫嗰陣會煲水，並唔係因為鍾意獸醫！其實係貓貓喺壓力大（恐懼）嗰陣嘅自我紓壓機制，可以緩解焦慮、等自己冷靜落嚟。
2. 中低音：貓媽媽同BB貓嘅對話
幼貓大概喺出世兩日後就會識得煲水。因為BB貓仲未開眼、聽力亦未發育好，貓媽媽會透過煲水（震動）話畀BB貓知自己就喺身邊，等BB貓安心。
貓媽媽煲水聲除咗紓緩生完BB嘅痛楚，亦代表「媽咪喺度～」；而幼貓煲水就代表「我飲飽喇～我冇事～」。
專家推測呢種透過震動嘅溝通方式，係因為貓貓以前喺野外生活時，要避免畀天敵發現BB貓，所以用煲水震動代替喵喵叫，等媽媽同BB貓搵到對方之餘又相對安全。
3. 中低音：放鬆、幸福、同你示愛
當貓貓對環境同人類都極具信任感時，會發出比較細聲、比較緩和嘅煲水聲，通常係食緊好嘢食、畀主人摸摸、或者感情好嘅貓貓互相舔毛時，嗰種好滿足嘅時候。
4. 高音：同你撒嬌、有求於你
貓貓比較高音嘅煲水聲，同人類BB喊嘅音頻好似，會令人類聽到之後有種「要即刻幫佢做啲嘢」嘅焦慮感。通常貓貓想表達嘅意思會係：肚餓呀畀嘢食、陪我玩啦、望下我啦等等，總之就係貓貓想你即刻做某樣嘢！
煲水係自發性嘅，但可以被人類強化！當貓貓發現佢一煲水，奴才就會有反應嘅時候，佢第日就可能會用煲水嚟驅使你做嘢！
例如：貓貓覺得畀你摸好舒服就會開始煲水，煲水之後你會繼續摸，佢就會認為只要煲水就會得到想要嘅結果。（甚至有啲貓會「煲水」加「咬人」，代表佢又愛又恨，叫你摸但又唔好太大力！）
貓貓煲水聲可以療癒人類？
貓貓煲水聲可以促進人體血清素（快樂荷爾蒙）分泌，會令人身心平靜、改善睡眠質素。
所以下次心情唔好、好攰嘅時候，不如就攬住主子，等佢幫你做個「煲水療程」嚟療癒下身心啦～
咁獅子、老虎都會煲水㗎？
答案係會㗎！
大部分貓科動物喺感到滿足、開心嘅時候都會發出煲水聲，但獅子、老虎嘅煲水聲同貓貓聽起上嚟唔多一樣，比較似大聲咆哮或者汽車引擎嘅聲～
參考資料：
