各位奴才係咪都想喺屋企種啲花草，幫家居增添綠意同質感？但要小心，原來好多常見植物都可能令主子中毒！例如大熱嘅網紅植物：龜背竹（龜背芋）其實對貓有毒㗎！到底邊啲植物適合養貓家庭種植？即刻話你知！
以下係養貓不能種的植物，或者絕對唔建議放喺貓貓接觸到嘅地方：
- 龜背竹 / 龜背芋（含草酸鈣結晶，會刺激口腔）
- 虎尾蘭
- 觀音蓮：黑葉觀音蓮、絨葉觀音蓮
- 秋海棠屬：星點秋海棠、地毯秋海棠
- 合果芋
- 萬年青（粗肋草）
注意！萬一貓貓唔小心誤食，可能會造成流口水、嘔吐、肚痾等中毒症狀，嚴重時記得即刻帶佢睇獸醫呀！
養貓唔代表要完全放棄種植，只要識揀，擺放一啲貓咪誤食都唔會中毒嘅盆栽，一樣可以提升家居生活質感。
大部份蕨類對貓咪無毒，唔需要太多陽光、唔洗頻繁淋水，係新手入門嘅好選擇。例如：鹿角蕨、兔腳蕨，好多文青 Cafe 都見到佢哋嘅蹤影㗎！
對貓咪無毒又耐陰嘅觀葉植物，葉片有細緻嘅紋路，令空間更加分，好適合做家居點綴。例如：青蘋果竹芋（大熱之選！）、油畫竹芋、雙線竹芋 貓奴都可以放心種。
椒草類對貓咪無毒，耐陰又好打理，亦係適合新手嘅選擇。圓圓肥肥嘅葉片相當討喜！例如：紅蘋果椒草、西瓜皮椒草、圓葉椒草。
美國愛護動物協會 ASPCA 整理咗一份植物清單，只要喺搜尋欄打個植物學名（通常係英文），就可以 Check 到對貓狗有無毒性（Toxic to Cats / Non-Toxic to Cats）。下次見到心儀植物，記得查咗先好買呀！
養貓偶爾需要作出少少取捨，犧牲一啲自己鍾意嘅植物。但只要取得平衡，一樣可以令生活過得舒適有質感，又唔會令主子受苦。
