身為貓奴嘅你，聽過「木薯貓砂」未？呢種新興嘅貓砂主打天然環保、低粉塵又好鏟，成為好多奴才嘅新寵。不過因為市面上相關產品比較少，名氣未夠礦砂、豆腐砂咁大，如果你最近有打算幫主子「轉砂」，不妨參考以下介紹，深入了解下咩係木薯砂。
木薯砂係咩？木薯砂成分大解構！
木薯砂係一種用天然植物成分整成嘅貓砂，主要成分包括木薯粉、豌豆纖維、梳打粉（小蘇打）、澱粉等天然材料，主打天然環保、極少粉塵、易鏟，係好多貓奴替代傳統礦砂嘅新選擇！
木薯砂好用嗎？6 大木薯貓砂優點！
木薯砂到底好唔好用？各位奴才一定最關心呢點！木薯砂因為有特殊嘅植物配方，用起上嚟唔單止輕巧方便，仲解決咗好多鏟屎時嘅煩惱，以下係幾個令貓奴愛上佢嘅優點：
1. 低粉塵，對氣管更友善
鏟屎最怕塵土飛揚，次次鏟砂都要戴口罩。木薯砂唔似礦砂咁容易起塵，使用時粉塵極少，對貓貓同奴才嘅氣管/呼吸道都更友善，特別適合有鼻敏感嘅家庭。
2. 秒速結團，鏟屎更方便
由於木薯粉同澱粉嘅特性，木薯砂吸水力強，可以迅速吸收尿液並凝結成塊，令清理更輕鬆，唔會一鏟起就散開變碎濕濕。
3. 重量極輕，搬運更慳力
木薯砂比礦砂輕身好多，無論係轉砂、補砂定係搬運，都可以輕鬆搞掂，奴才條腰終於唔洗受罪。
4. 環保可分解，對地球更友善
木薯砂來自天然植物澱粉，使用後可以自然分解，同傳統礦砂相比，對環境嘅負擔細好多。
５. 成分天然，貓貓食咗都唔驚
木薯砂採用純天然植物成分製成，唔含有害化學物質，即使好奇嘅貓貓偶爾誤食，都唔會對健康造成嚴重威脅，對於鍾意舔手仔腳仔嘅貓貓嚟講係一大安心選擇。
６. 顆粒細，腳感好
木薯砂嘅顆粒比好多其他貓砂更細小柔軟，貓貓踩落去腳感舒適，唔會吉親肉球（肉墊），不過具體都要睇返每隻貓貓嘅喜好。
木薯砂缺點有邊啲？３ 大木薯貓砂缺點！
木薯砂雖然有唔少優點，但對於某啲奴才嚟講，都仲有幾個地方需要考慮，以下係使用木薯砂可能會遇到嘅三個缺點：
1. 價錢較貴，適合單貓家庭
木薯砂因為使用天然植物成分，生產成本較高，所以價錢普遍比礦砂、豆腐砂貴，特別係進口品牌就更加唔平。
如果屋企係多貓家庭，貓砂消耗量大，長期用落可能會係一筆唔細嘅開支，對預算有限嘅奴才嚟講，性價比（CP 值）就見仁見智啦。
2. 質地輕顆粒細，容易帶砂（沙漠化）
木薯砂質地比較輕，貓貓去完廁所好容易踩到並帶出貓砂盤，特別係鍾意撥砂嘅貓貓，可能會將貓砂踢得到處都係（變成沙漠），需要搭配貓砂墊嚟減少帶砂問題，或者養成每日吸塵掃地嘅習慣。
３. 不可沖入馬桶
由於木薯凝結力強，亦即係話佢溶水力相對較低，所以木薯砂團絕對唔可以沖入馬桶！如果唔係好易塞渠㗎！
驚貓貓唔適應木薯砂？先試下「溝砂」！
如果貓貓本身用開豆腐砂、無法順利轉砂嘅話，可以先由「溝砂」（混合砂）開始！
將兩種貓砂混合，唔單止保留各自優點，同時也改善咗原有痛點。
- 木薯砂高黏性：快速吸水、緊緊鎖住尿塊，就算潮濕環境，都能保持砂盤乾爽，補強豆腐砂易散、易黏底嘅問題。
- 豆腐砂降低帶砂率：大顆粒豆腐砂可以減少木薯砂被帶出嘅機會。
由混合砂開始，幫貓貓慢慢適應、無痛轉砂，係換木薯砂前嘅好選擇！
木薯砂推薦邊隻？木薯貓砂評價總結
整體嚟講，木薯砂以天然、低粉塵、環保為主要賣點，非常適合重視貓貓健康、希望選擇更友善環境產品嘅家長們。
不過由於目前市面上嘅木薯砂選擇相對較少，同礦砂、豆腐砂等傳統貓砂相比，品牌種類亦唔算多，因此喺選擇時建議奴才們優先挑選成分天然、無添加、無漂白嘅木薯砂，等主子用得開心，奴才亦能更安心。
