你有冇聽過貓咪花色同個性有關嘅都市傳說？例如橘貓都係為食「傻更更」？三色貓全部都係女仔？
原來呢啲貓花色真係同基因有關係！你屋企隻主子又係咩花色呢？一齊嚟睇下香港常見嘅貓咪花色圖鑑，同埋貓咪個性嘅詳細分析啦～
貓咪花色 1｜黑貓
黑貓性格：一合埋眼就消失，天生自帶黑夜隱身術。
- 痴人、聰明又體貼
- 黑貓喺日本係招財、招桃花嘅吉利象徵（單身嘅朋友知要養咩貓啦）
貓咪花色 2｜橘貓 (橙貓)
橘貓個性：「十隻橘貓九隻肥」，愛食、愛叫、愛撒嬌。
- 受基因影響，大約有三分之二嘅橘貓都係男仔！公貓體型本身就比母貓大隻，所以唔好再話人哋肥喇（絕對唔係藉口）
貓咪花色 3｜賓士貓 (黑白貓)
賓士貓個性：貓界二哈（哈士奇），成日做出令人O咀嘅行為。
- 精力旺盛嘅賓士貓總係會有出人意表嘅騎呢舉動
- 雖然有啲百厭，但佢哋痴身撒嬌嗰陣真係會令人融化
貓咪花色 4｜三色貓 (三花貓)
三色貓個性：女人心，海底針，上一秒天堂下一秒地獄。
- 啱啱仲嬲緊，下一秒又鑽入你懷抱討摸，係有啲難捉摸嘅小公主
- 受基因影響，身上有黑、橙、白三隻色嘅三色貓，幾乎全部都係女仔嚟㗎
貓咪花色 5｜虎紋貓 (虎斑貓)
虎紋貓個性：同你夠熟先會撒嬌，係個內斂嘅驚喜包。
- 虎斑貓警覺性高，亦比較有主見，睇落唔易親近，但其實係個小迷糊，撒嬌嘅一面淨係得熟人先睇到
- 額頭有 M 字型嘅都算係虎紋貓喔
貓咪花色 6｜白貓
白貓個性：自帶仙氣嘅優雅貴族，都市傳說白貓都係一樣樣（？）
- 個性獨立嘅白貓佔有慾其實好強，聞到你身上有其他貓味會嬲豬
- 同基因遺傳有關，藍色眼嘅全白貓有 60% – 80% 係聽唔到嘢㗎
貓咪花色 7｜玳瑁貓
玳瑁貓個性：親人親貓脾氣好，溫柔懂事又超級愛撒嬌～
- 玳瑁貓係超痴身嘅「討摸王」，養過嘅主人都話讚
- 特別嘅係，玳瑁貓同三色貓一樣幾乎都係女仔，而且有招財、招桃花嘅象徵喔
貓咪花色 8｜白底虎斑貓
白底虎斑貓個性：聰明活潑又開朗，係個鍾意刷存在感嘅「High友」！
- 白底虎斑貓活力十足、反應靈敏、彈跳力驚人，成日喺屋企飛簷走壁。坊間傳聞，白色毛嘅範圍越多就越百厭！你屋企嗰隻係咪都係咁？
參考資料：
Sale!
