擼貓秘笈大公開！揭秘令主子爽到震嘅 5 大絕招…保證你學識呢啲「擼貓技巧」，令貓貓愛死你，黐實唔放！
如果貓貓本身對你零信任，而你又沖埋去直接摸佢個頭，佢分分鐘會嬲，甚至咬你一啖㗎～第一招摸頭殺、第二招由頭掃落尾、第三招搓麵粉式……即刻學嘢啦！
擼貓技巧 1｜摸頭殺
擼貓技巧：用手指腹輕輕喺貓貓頭頂打圈按摩，就可以令佢感受到你滿滿嘅愛意。
對於同你已經好熟嘅貓主子嚟講，「摸頭殺」當然係最溫柔嘅示愛方式；但對於仲未接受你嘅貓（或者陌生貓），摸頭殺唔係示愛，而係一種挑釁行為！貓貓會對你保持高度警惕，因為佢哋嘅前額係防禦雷區。
記住，如果貓貓完全唔信任你，千祈唔好伸手去摸頭，否則換嚟嘅可能係爪或者牙！
擼貓技巧 2｜一順到底（由頭掃落尾）
擼貓技巧：由個頭開始，沿住背脊順毛摸到落條尾，令佢喺你指尖下享受放鬆時光。
點解貓貓會鍾意被人「由頭掃落尾」？因為呢種全身接觸式嘅撫摸，可以畀到佢哋極大嘅安全感同信任感。貓貓好重視自己嘅地盤同氣味，你由頭摸到落尾，就好似同佢講緊「我完全接納你」。
咁樣摸法仲可以滿足貓貓自我清潔同梳理毛髮嘅生理需求（好似貓媽媽幫佢舔毛咁），令佢哋覺得被照顧周到。
擼貓技巧 3｜搓麵粉式按摩
擼貓技巧：將貓貓想像成一團軟綿綿嘅麵粉，輕輕揉捏同按壓（特別係面珠墩或頸背），有助放鬆肌肉。
其實呢種揉捏動作能夠刺激貓貓嘅感受神經，產生輕微嘅觸感刺激，令佢哋感到好Chill、好愉悅。
擼貓技巧 4｜輕揉耳仔
擼貓技巧：用指尖輕輕由貓貓耳仔根部摸到尖端，幫佢舒緩緊張同焦慮。
首先，貓貓耳仔上面有大量敏感嘅神經末梢，能夠感受到輕微嘅觸碰。當你揉捏佢耳仔嗰陣，可以刺激神經產生一種酥麻嘅舒適感，令貓貓覺得好放鬆。
同時，模仿貓貓用手洗面、清理耳仔嘅動作，會令佢哋覺得好似自己梳洗緊咁，特別有親切感。
擼貓技巧 5｜輕拍 Pat Pat
擼貓技巧：用手掌輕輕拍打貓貓嘅 Pat Pat（近尾巴根部），呢個位置係貓界嘅「爽點」！
貓貓嘅 Pat Pat 同尾巴根部皮膚擁有極大量敏感神經。當受到輕微嘅壓力刺激（拍打）時，神經元會被激活，向大腦傳遞愉悅嘅信號。
呢種刺激仲會促進貓貓體內分泌多巴胺同內啡肽等「快樂荷爾蒙」，令佢哋High到翹起個 Pat Pat！
咁多巴胺同內啡肽係咩嚟？佢哋都被稱為「快樂化學物質」：
- 多巴胺 (Dopamine)：係一種神經傳導物質，負責傳遞興奮同開心嘅訊息。當貓貓被人拍 Pat Pat 嗰陣，多巴胺分泌會令佢哋覺得好爽、好興奮同好滿足。
- 內啡肽 (Endorphins)：類似天然嘅鎮痛劑，幫貓貓調節情緒、減少壓力。當貓貓被人摸嗰陣，內啡肽分泌會令佢哋覺得好放鬆、好有安全感。
