貓搬屋攻略，拆解貓搬屋唔食野原因、安撫方法及注意事項

對人類嚟講，搬屋係生活嘅新開始，但對主子嚟講，隨時係一場天崩地裂嘅災難。貓係地盤意識極強嘅動物，對環境變動非常敏感。貓搬屋唔單止係地點嘅轉移，更加係佢哋核心領土嘅徹底重組。

如果處理得唔好，貓咪可能會出現長期焦慮、甚至發生貓搬屋唔食野嘅情況，嚴重仲會喺搬運過程中嚇到走失。想帶搬屋貓順利過渡，關鍵在於「漸進式流程」同「保留舊氣味」。

本文提供一套標準化嘅「低壓搬屋計劃」，幫各位鏟屎官陪愛貓安全渡過適應期。

帶貓搬屋點部署？由前置到行動嘅具體清單！

成功嘅搬屋需要提早部署，請參考以下時間表，確保每個環節都萬無一失。

1. 前置期（搬屋前 2 - 4 星期）

外出籠減敏訓練：提早將貓籠/外出袋放喺廳中間，裡面鋪張有主子味嘅被仔或者放入零食，等佢習慣喺入面食嘢或休息，避免貓搬屋當日因為強行捉佢入籠而嚇親。
醫療與行政準備：記得向漁護署更改晶片地址資料（萬一走失都可以搵返）。
建議諮詢獸醫：如果貓貓極度細膽或者有暈車浪史，請諮詢獸醫係咪需要開定鎮靜藥物或費洛蒙產品。

貓奴必讀：【2025 最新】帶貓搭車全攻略！寵物推車及交通工具規範

2. 準備期（搬屋前 1 星期）

氣味佈置：喺舊居同新屋同時用定貓咪費洛蒙插電組（如 Feliway），釋放令貓貓放鬆嘅訊號。
打包技巧：「先舊後新」千祈唔好洗貓貓嘅床仔、抓板或舊貓砂（如果唔係太臭請保留少少舊砂），呢啲舊氣味係搬屋貓最重要嘅安全感來源。貓用品應該留到最後一刻先執。

3. 行動期（搬屋當日）

隔離優先原則：喺搬運工人嚟之前，一定要先將貓鎖入一間已經清空嘅房或者入籠，門口貼上「內有貓貓，絕對不准開門」等顯眼大字，防止搬運過程貓貓受驚衝出門口。
移動過程：喺外出籠外面蓋一塊厚布減少視覺刺激，運送途中無論貓貓點樣慘叫，都絕對唔好打開籠門，避免佢喺混亂中走失。

多貓搬屋嘅防禦性策略！

多貓家庭搬屋嘅壓力係倍增嘅，為咗避免貓貓喺高壓下發生「轉移性攻擊」（原本感情好嘅貓突然打交），請遵守以下原則：

1. 一貓一籠

除非係糖黐豆、一定要黐埋一齊先定到驚嘅老伴侶（Bonded pair），否則建議分開入籠，避免狹窄空間內因壓力而開拖。

2. 新屋領域分配

如果本身貓貓就有分黨分派（例如 A、B 貓感情好，C 貓獨家村），去到新屋應該將唔同黨派安置喺唔同房，等情緒穩定先再見面。

貓搬屋入伙注意事項！

去到新屋，貓咪嘅探索必須係受控嘅。

1. 設置核心領域（Safe Room）

唔好即刻畀貓貓跑全屋！先佈置好一間獨立房（安全房），裡面要有齊舊貓砂盆、糧碗、水碗同足夠嘅躲藏位（例如紙箱）。請務必佈置好晒，先放貓出嚟。

2. 檢查安全防護網（窗網）

貓搬屋期間係走失嘅高峰期，請務必檢查：

門窗防護：新屋嘅窗網鎖好未？露台有冇防護網？檢查廚櫃底、牆縫等隱蔽窿位，防止貓貓鑽入去困住。
絕對關籠：喺公共空間（如走廊、電梯）移動時，全程不離籠、不離手。

貓搬屋要適應幾耐？

初期（1 – 3 日）：貓貓一直匿埋係正常反應。請提供足夠嘅躲藏空間，唔好強迫互動，等佢自己出嚟探索間房。
中期（1 星期 – 1 個月）：每隻貓嘅適應力唔同。當貓貓表現出食得飲得、主動嗲人或者喺房入面放鬆伸懶腰，先好慢慢開門縫，等佢一次多探索一個空間。

注意！對於習慣放養或去街嘅貓，建議喺新屋室內至少關養 2 – 4 星期，確認佢已經當新屋係「核心地盤」先再考慮放行。

貓搬屋常見 Q&A！

Q1：貓搬屋一直叫點算？

呢個係貓貓表達焦慮或者重新用聲音標記地盤嘅方式。

解法：喺籠外面蓋布遮住視線，放入有奴才汗味嘅舊衫提供嗅覺安全感。用費洛蒙噴霧安撫，請保持溫柔語氣，避免大聲鬧佢，以免增加佢嘅挫折感。

Q2：貓搬屋唔食野點算？

搬屋後頭 1 – 2 日因為壓力導致食慾下降係好常見。

警訊：貓搬屋唔食野可以點做？可以畀啲重口味、吸引力高嘅副食罐或肉泥引誘佢。如果貓貓連續 72 小時（3 日）完全冇食嘢，極可能引發「脂肪肝」風險，請務必立即帶去睇獸醫。

Q3：貓搬屋唔去廁所正唔正常？

壓力會導致貓貓忍尿或便秘，長期忍尿可能引發自發性膀胱炎 (FIC)。

解法：一定要用舊貓砂同舊砂盆，並將砂盆放喺房入面最隱蔽、安靜嘅角落。如果超過 48 小時冇屙尿，建議諮詢獸醫。

貓奴必讀：貓咪膀胱炎係壓力警報？了解膀胱炎原因、治療方法

Q4：貓搬屋一直喘氣/開口抖氣？

貓貓如果出現張口呼吸（好似狗咁）、明顯喘氣，通常係極度緊張或中暑嘅徵兆。

緊急處置：即刻將貓移去通風、涼爽同暗嘅安靜地方休息。如果休息後都仲係喘氣或者條脷發紫，可能係心臟問題或熱衰竭警訊，請立即聯絡急症獸醫。

搬屋係一時嘅，但貓貓嘅安全同心理健康係長久嘅。畀足夠嘅時間、熟悉嘅氣味同唔強迫嘅愛，搬屋貓終會將呢個新地方，變成溫暖嘅新屋企。

超凝講堂